జీవితమే ఒక ఆర్కుట్

 అంతర్జాలంలో గంటలు గంటలు గడిపే వాళ్ళకి సుపరిచితమైన పేరు "ఆర్కుట్". చిన్నప్పటి స్నేహితులు నుండి బహు దూరపు బందువుల దాకా అందరినీ కలిపే వేదిక. ఇప్పుడైతే అందరు మొహంపుస్తకం (Facebook) ఎక్కువగా వాడుతున్నారు కాని., నిన్న మొన్నటి దాకా ఆర్కుట్ చేసిన హడావుడి అంతా ఇంతా కాదు.

దూరం ఐన స్నేహితులనే కాకుండా, కొత్త కొత్త స్నేహాలను కూడా పరిచయం చేసింది ఆర్కుట్. ఉదాహరణకు "ఆర్కుట్ లోని పరిచయం స్నేహంగా, స్నేహం ప్రేమగా, ప్రేమ ఇంకేదోగా మారి, పిచ్చయ(19), పుల్లమ(18) అనే ప్రేమజంట, పెద్దలను ఎదిరించి, ఫలానా గుళ్ళో పెళ్లి చేసుకున్నారు(శాస్త్రోక్తంగా)" ఇలాంటి వార్తలు అప్పుడప్పుడు దినపత్రికలలో చూసే ఉంటారు. ఇప్పుడు ఈ ఆర్కుట్ గురించి ఇంత పెద్ద మొత్తంలో రచ్చ ఎందుకు చేస్తున్నాను అంటే, ఆర్కుట్ మీద నేను ఒక పాట రాసానన్నమాట!!!! దానిని ప్రత్యేకంగా మీకోసం ఈ శీర్షికలో........

అనట్టు చెప్పటం మర్చిపోయా, ఈ పాట "కొండ వీటి దొంగ" చిత్రంలో పాటకి దగ్గరగా ఉంటుంది.

పల్లవి ||

జీవితమే ఒక ఆర్కుట్, సాహసమే ఒక స్క్రాప్ బుక్

బాగా నెట్వర్క్ ఉన్నన్నాళ్ళు ఉండవు మనకే కష్టాలూ

చుట్టాలైన, స్నేహితులైనా అంతా నా వాళ్ళు

ఎవరూ దాగలేరు, యాడ్ కాక ఉండలేరు.

                                                 ||జీవితమే||

చరణం||
జాడే లేని ఎదవల కోసం, సెర్చ్ బటన్ నే యూస్ చేస్తా

ప్రతి ప్రొఫైల్ ను వెతికి వెతికి జాడేంటోనే పట్టేస్తా

ఫ్రెండ్స్ ఐన, నాన్ ఫ్రెండ్స్ ఐన, మెసేజ్ చేయక వదలను రా, వదలను రా

                                                 ||జీవితమే||

చరణం||

ఎప్పుడో చూసిన చిత్రంలోని వీడియోని నే యాడ్ చేస్తా

ప్రతి ఆల్బం తెరచి తెరచి కామెంటే నే చేస్తా

యావత్ ప్రపంచం, అయినది కొంచం , అల్లుకోక ఇక ఉండకు రా, ఉండకు రా

                                                 ||జీవితమే||

నీ స్నేహం ఇక రాదు అని.....

జీవితంలో ఎప్పుడు సంతోషాలే ఉండవు. అప్పుడప్పుడు కష్టాలు కుడా ఉంటాయి. అలా ఉంటేనే జీవితం అవుతుంది. లేకపోతె జీవితం వెల్తిగా ఉంటుంది. అలాంటి కష్టం ఇప్పుడు నాకు వచ్చింది. అది మీ అందరితో పంచుకుందామని ఈ శీర్షిక రాస్తున్నాను. మన జీవితంలోకి ఎంతో మంది వస్తుంటారు పోతుంటారు. కానీ కొంత మంది పోయేటప్పుడు చాల బాదేస్తుంది. వాళ్ళ జ్ఞాపకాలు మనల్ని ఉక్కిరి బిక్కిరి చేస్తాయి. అలాంటి ఒక స్నేహం నాకు దూరం అయింది.

మా స్నేహం ఇప్పటిది కాదు, 24 సంవత్సరాల అనుభందం. ఒకరికి ఒకరం కష్టాల్లో, బాధల్లో తోడుగా ఉన్నాం. నాకు ఎ కష్టం వచ్చిన నాకు అండగా నిలిచింది మా స్నేహం. ఎన్నో సార్లు మా మధ్య చిన్న చిన్న గొడవలు వచ్చాయి. కానీ అవి ఎప్పటికప్పుడు మొబ్బులా తేలిపోయాయి. తనతో సాగిన ప్రయాణం ఏంతో మధురంగా గడిచింది. ఎంతో మంది నా వాళ్ళు నన్ను కాదు అని వెళ్ళిపోయినా, నాకు దైర్యం చెప్పి, నా వెన్నంటే ఉన్న స్నేహం ఇప్పుడు నాతో లేదనే నిజాన్ని నేను జీర్ణించుకోవటం కొంచం కష్టమే!!

ఇదివరకు నన్ను కాదని చాల మంది నా నుంచి వెళ్ళిపోయారు. నా అవసరాన్ని తెలుసుకుని మళ్లి నాతో చేరారు. వెళ్ళేటప్పుడు తిట్టినా వాళ్లే, నాతో చేరేటప్పుడు నేనే గొప్ప అని పొగిడారు. ఇలాంటివి నాకు కొత్త కాదు. ఐనా నా జీవితంలో ఇక ఆ స్నేహానికి చోటు లేదని తెల్సి నాలో బాధ, రాజ శేఖర రెడ్డి ప్రభుత్వంలో నదులు పొంగినట్టు ఉప్పొంగి పోతున్నది.

ఆంగ్లంలో ఒక సామెత ఉంది "A friend in need is a friend in deed" అంటే తెలుగులో "ఆపదలో ఆదుకునేవాడే నిజమైన స్నేహితుడు". నీకు తెల్సు ఆరేళ్ళుగా నేను పడుతున్న కష్టం, ఈ మధ్య కాలంలో మరెన్నో సమస్యలు ఇంట బయట నాకు నిద్ర పట్టకుండా చేస్తుంటే., ఇప్పుడు వెళ్లిపోతనంటావా ????

నీవు నాతొ మాట్లాడకపోతే ఏదో కోల్పోయినట్టు, జీవితం సూన్యంలా అనిపిస్తున్నది. నీకు తెల్సు నాకు ఎన్ని సమస్యలున్నాయో. ఆరు సంవత్సరాల నుంచి నేను పడుతున్న బాధ, నా కష్టాలు అన్ని నీకు తెల్సు. ఇన్నాళ్ళు అన్నింటిలో నువ్వు తోడూ ఉన్నావ్ అన్న దైర్యం నన్ను నడిపించింది. నా కోసం కనీసం ఈ శీర్షిక చదివిన తర్వాత ఐనా మళ్లి వచ్చి నాతొ చేరతావని, మునుపటి లాగా మాట్లాడతావని ..... ఆశిస్తూ.......

ఇట్లు,

మీ చంద్ర బాబు నాయిడు,

జై తెలుగుదేశం, జై జై చంద్ర బాబు.

(నాగం జనార్ధన రెడ్డి గారి కోసం మాజీ ముఖ్యమంత్రి, రాజకీయ చాణక్యుడు,భావి భారత ప్రధాని, ఆంధ్ర ప్రదేశ్ CEO, చంద్రబాబు నాయుడి గారి మనో వేదనని తమాషాగా.,)

తెలుగు లేని తెలుగు చిత్రం

మైసూరుపాక్ లో మైసూరు ఉంటుందా? బందరు లడ్డులో బందరు ఉంటుందా? అలానే తెలుగు చిత్రాలలో తెలుగు ఉండదు. ఇది సత్యం. ఇటీవల విజయవంతం ఐన రెండు తెలుగు చిత్రాల పేర్లు చెప్పండి? "Mr.Perfect", "100%Love". పేర్లు మాత్రమె ఆంగ్లంలో ఉన్నాయి అనుకుని వెళ్ళాను. కానీ చిత్రం ఆసాంతం ఆంగ్లంలోనే ఉంది. ఆఖరికి పాటలు కూడా ఆంగ్లంలోనే ఉన్నాయి. "Infactuation" అని, నా పిండాకూడని పాటల్లో కూడా ఆంగ్ల పదాలే ఎక్కువ వినపడ్డాయి. ఈ మధ్య ఆంగ్లంలో మాట్లాడటమే అనుకున్నా, పాటలు రాయటం కూడా ఒక వేలంవెర్రి అయ్యింది. తెలుగులో చక్కని పదాలతో రాసే అవకాశం ఉన్నా, రాయటంలేదు. ఉదాహరణకు Mr.Perfect చిత్రంలోని ఈ పాటని చూద్దాం.

ఆకాశం బద్దలైన sound గుండెల్లోన మోగుతుంది నిన్ను కలిశాక

మేఘాలే గుద్దుకున్న light కళ్లలోన చేరుకుంది నిన్ను కలిశాక

రై రై రై ride చేసెయ్, rocket లా మనసుని

సై సై సై side చేసెయ్, signals తో ఎం పని?

ఇక hi-way లైన one-way లైన కదలదే బండి तेरे बिना

ఈ పాటని చక్కగా తెలుగులో ఎంత సరళంగా రాయచ్చో చూద్దాం.

ఆకాశం బద్దలైన మోత గుండెల్లోన మోగుతుంది నిన్ను కలిశాక

మేఘాలే గుద్దుకున్న కాంతి కళ్లలోన చేరుకుంది నిన్ను కలిశాక

రై రై రై రయ్యిమంటూ, రోజంతా గడవని

సై సై సై సిగ్గు దోచేయ్, సమయంతో ఎం పని?

ఇక ఏదేమైనా, ఎప్పటికైనా కదలదే బండి నువ్వులేకున్న!!

ఇలా తేట తెలుగులో రాస్తే ఎంత బాగుంది? చెప్పండి!!! ప్రాస కలిసింది, ఇక అర్ధం అంటారా? ఎ బూతు రాస్తే ఏంటి చెప్పండి? అందులోనే ఇంకొక చోట

"ఇక daating ఐన fighting ఐన గడవదే రోజు तेरे बिना(తేరే బిన)" అని రాసారు, దాని బదులు

"ఇక సరసం ఐన సమరం ఐన గడవదే రోజు నువ్వు లేకుండా" అని తెలుగులో రాస్తే ఎంత కమ్మగా ఉంది!!!

ఆ तेरे बिना(తేరే బిన) అనే పదం పాటలో చాల సార్లు వాడారు. ప్రతి చోట తెలుగులో మార్చే అవకాశం ఉంది. కానీ రాయరు. అసలు ఆ పాటలో మొత్తం మీద 27 ఆంగ్ల పదాలు ఉన్నాయి. ఈ ఒక్క పాటే కాదు, ఇలా చాలా పాటలు ఉన్నాయి. తేట తెలుగు పాటని ఆంగ్లంతో తాట తీయటంతోటి, తెలుగు కనపడకుండా పోతున్నది.

పై పాట రాసినతని పేరు "అనంత శ్రీరామ్" అట!!!! పేరు ఐతే నా పేరుతొ కల్సింది కాని, నా అంత బాగా రాయాలంటే కష్టం కదా!! ఏదో తనకున్న పరిదిలో, తనకున్న పరిజ్ఞానంతో బాగానే రాసాడు. కాకపోతే తెలుగు పాటగనుక తెలుగులో రాస్తే బాగుండేది.

ఇది ఈ రోజు వచ్చింది కాదు. అప్పుడెప్పుడో నేను పుట్టక ముందు చిరంజీవి మామయ్య చిత్రంలో

"నవ్వింది మల్లె చెండు, నచ్చింది girl friend" అనే పాట మీకు గుర్తుండే ఉంటుంది. దానినే తెలుగులో చక్కగా

" నవ్వింది మల్లె చెండు, నచ్చింది జాంపండు" అని రాస్తే, బాల సుబ్రహ్మణ్యం గారికి పాడటం కష్టమవ్వదు కదా? రాయటం రాకపోతే నాలాంటి వాళ్ళని అడిగితె చెప్తాము కదా!!!!!!!

ఇలా చెప్పుకుంటూ పొతే చాల పాటలు ఉన్నాయి., మొన్నా మధ్య ఒక తెలుగురాని స్నేహితుడితో తెలుగు చిత్రానికి వెళ్ళాము. వాడు మొదట అర్ధం కాదేమో అని భయపడ్డాడు. "నీకు అర్ధం కాకపోతే నన్ను అడగరా చెప్తాను" అన్నాను. వాడు, చిత్రం ఆసాంతం మహా ఐతే ఒకటి రెండు సార్లు నన్ను అడిగి ఉంటాడేమో. ఆ చిత్రంలో కధానాయకుడు ఆస్ట్రేలియాలో ఇంజనీర్. మన కధానాయకుడు ఎక్కడైనా తెలుగులో మాట్లడతే ఈల వేద్దాం అని నా రెండు వెళ్ళు నోట్లో పెట్టుకుని కూర్చున్నాను . వేళ్ళు తడిసి ముద్ద అయ్యాయి తప్ప, మన కదానాయకుడు తెలుగులో మాట్లాడింది లేదు, నేను ఈల వేసింది లేదు. దీన్ని బట్టి అర్ధం అవుతుంది తెలుగు చిత్రాలలో తెలుగు ఎ మాత్రం ఉందో??

ఈ విషయం మీద నేను ఆ దర్శక నిర్మాతలతో మాట్లాడాను. "అనంతరామయ్య గారు, చిత్రాలు నిజ జీవితానికి దగ్గర తీయాలని ప్రయత్నించాము. మన వాళ్ళు తెలుగులో మాట్లాడటం తక్కువే కదా, అదే మా చిత్రంలో చూపించాం" అని అన్నారు.నిజామే కదా., ప్రతి కుక్కకి ఆంగ్లంలో మాట్లాడటం ఒక వెర్రి అయింది.

మొన్నా మధ్య విడుదలైన "కొంచం ఇష్టం కొంచం కష్టం" అనే చిత్రానికి దర్శక నిర్మాతలు తప్ప మిగిలిన వారెవ్వరూ తెలుగువారు కాదని తెల్సి ఆశ్చర్యపోయా. ఎలాగూ మనవాళ్ళకి తెలుగు కధానాయికలు నచ్చరు కాబట్టి కధానాయిక తెలుగు పాప కాదు, అస్సలు తెలుగు రాదు. కధానాయకుడు తెలుగు వాడు కాదు, సంగీత దర్శకుడు తెలుగు వాడు కాదు., అందరు తెలుగు వాళ్ళే ఉండాలా అంటే కాదు కాని, తెలుగు వాళ్ళైతే బాగుంటుంది అంటున్నాను. అంతేలే, తిరుమలలో గుండు చేయించుకొని, కొండ దిగొచ్చి ఎవడైనా తిరుపతిలో దువ్వెన కొంటాడా? జగన్ అన్న బొమ్మ లేకుండా సాక్షి దినపత్రిక వస్తుందా? ఆంగ్లం లేకుండా తెలుగు చిత్రాలు వస్తాయా? నా పిచ్చి కాక పొతే!!!!!

సశేషం.............